Horregaz batera, eleizbarrutien eremuak be bat datoz euskalkien muga geografikoakaz. Bizkaierearen eremua Calahorrako eleizbarrutiaren menpean egon zan, eta hegoaldeko ganerako euskalkiak, barriz, Iruñekoaren menpean. Azpimarratzekoa da Araba osoa eta Nafarroako haran bat (Ameskoa) Calahorrako eleizbarrutian egozala eta, ezaguna danez, hango berbeten mendebaldeko kutsua nabarmen-nabarmena da. Dana dala, ez dau emoten, orokorrean, Arabako euskerea bizkaiera hutsa zanik. Pertsonalidade berezia eukan, bizkaierearen ezaugarri asko euki arren.

Yrizarrek 1970. urtean egindako ikerlanaren arabera, bizkaieraz 200.000 lagunek egiten eben berba, eta Euskal Herriko lehenengo euskalkia zan hiztunen kopuruari jagokonez. Kontua da azken 30 urteotan euskerearen egoerea asko aldatu dala Bizkaian, eta euskeraz egiten daben pertsonak askozaz be gehiago dirala gaur egun, zorionez; dana dala, ez dago jakiterik zehatz-mehatz zelakoa izan dan bizkaieraz berba egiten dabenen eboluzinoa. Begi bistakoa da hezkuntza sistemeari esker, euskeraz ikasi daben askok euskera batuaz ikasi dabena eta ez bizkaieraz.